Samunder mein utarti hoon toh...aankhein bhiig jaati hain
teri aankhon ko parhti hoon to...aankhein bhiig jaati hain

tumhara naam likhne ki ijaazat chinn gaii jab se
koii bi lafz likhti hoon to...aankhein bhiig jaati hain

teri yaadoon ki khushboo khirkioon mein raqs karti hai
tere gham mein sulagti hoon to...aankhein bhiig jaati hain

main hans ke jhel leti hoon judaii ki sabhi rasmein
gale jab uske lagti hoon to...aankhein bhiig jaati hain

na jaane ho gayi  hoon is qadar naraaz kab se
kisi se baat karti hoon to...aankhein bhiig jaati hain

woh sab guzre hue lamhaat mujh ko yaad aate hain
tumhare khatt jo parhti hoon to...aankhein bhiig jaati hain

main saraa din bohat masroof rehti hoon magar yoonhi
qadm chokhat par rakhti hoon to...aankhein bhiig jaati hain

har ik muflis ke maathe par alam ki daastaanein hain
koii bi chehraa parhti hoon to...aankhein bhiig jaati hain

Badey  logon ke oonche badnumaa aur sard mahalon ko
gariib ki aankhoon se takti hoon to...aankhein bhiig jaati hain

tere koochay se mera talluk ab waajib saa hai
magar jab bi guzarti hoon to...aankhein bhiig jaati hain

hazaron mausmoo ki humraani hai mere dil par
"sadi" main jab bi hansti  hoon to...aankhein bhiig jaati hain

Tags: Samaa

Bookmark: